12月16日賓賓仔最新情況
Today at 10:24pm
我好叻架，食緊婆婆買黎俾我0既菜菜，左邊隻耳仔因為吊緊鹽水，用粉紅色繃帶包住左～聽日我會更叻架，到時拆走鹽水管，返屋企食菜菜!!
非常非常感恩，今日一切順利。
首先同大家講左最情況先，稍後再分享多D今朝有關捐血0既事，如果大家有興趣睇就睇哂落去！
賓賓今日真係好叻仔，一早血色素已經由琴日0既11%升到17%，到傍晚我離開醫院，又再升到19%，雖然比第一日入院仲係低少少，但都算係起色，病情有進展，仔精神好左，檢查時仲識得用力踢醫生，我陪住仔大半日，仔有胃口，草粉食得好快，有自己食草食菜食糧，而家最希望係唔好反覆，一路繼續有改善有進展，如果情況滿意，醫生話聽晚就會趕仔返屋企，知道仔一定好掛住屋企，好掛住公公婆婆姨媽同姨姨！我心情係比琴日輕鬆好多，但仍然唔敢太樂觀，默默繼續支持仔鼓勵仔，希望仔聽日再好返多ｄ，聽晚真係可以抱住乖豬仔返屋企～
有關綠膿桿菌方面，醫生仍然係唔確定，只係憑好表面0既觀察而估計，最終仍要等化驗所結果出黎先可以確定。醫生話呢種菌其實好常見，周圍都會有，但屬於惡菌，抗藥性高，雖然未有化驗結果，醫生已經開左一種抗藥性比較低0既抗生素俾賓賓，假如真係呢隻菌作怪，抗生素應該幫緊仔了。
至於捐血方面，再一次感激兔協同兔友Peony幫忙，今朝我一早帶住三個乖寶寶去大圍，好彩仲有Peony表妹Phoebe一齊，去到大圍，醫生話賓賓情況有好轉，並冇迫切性要輸血，她俾我考慮係咪繼續進行抽血，然後將血儲存起，假如賓賓必要時真係要用，都會有血預備好。我原本係打算唔幫任何一隻兔寶寶抽血的，因為既然冇迫切性，我唔想兔地白白要受苦，但同兔協義工Shirley傾過，Shirley傾向既然已經安排好哂，就先幫一個寶寶抽血，免得再次緊急時，未必可以好順利咁有兔兔ready捐血。於是，我請求醫生首先幫兔協兩個寶寶檢查，先挑選健康比較好的寶寶進行捐血。好可惜，兔協兩個寶寶都唔適合捐血，其中一個係因為太輕，只有1.9kg，而另一個則因為血色素唔夠，只有32%，屬於正常range的最底線，雖然醫生話仍然可以捐血，但絕對唔係理想0既捐血者，我當然即時決定唔要兩個寶寶冒險，所以最後就冇進行捐血了。Peony的兔兔Momo超乖，而且體重絕對達標，但已經超過六歲，當醫生話賓賓唔迫切要輸血，我已經即時決定唔會要Momo捐血，辛苦Phoebe帶住Momo遊左一轉車河。
今朝一早起身，我忍唔住企0係屋企客廳喊，因為壓力實在太大了，我帶住三個兔寶寶，我諗到要兔地無端受苦，見到三個都係咁乖咁健康，我諗自己係咪太殘忍，而且仲擔心賓賓輸血後會唔會排斥。後來，Wing So開解我，話捐血輸血都係最後0既唯一辦法，並唔係有心傷害任何一隻兔仔，而且，如果今次捐血輸血成功，都算係開左先例，假如第日再有兔兔有需要，都可以再參考今次經驗，希望其他兔兔得益。另外，兔協Shirley琴晚俾我帶走兩個兔寶寶時同我講，今次借出兔寶寶去拯救賓賓，都係想令人知道，呢群乖寶寶雖然係棄兔，縱使係被遺棄，兔寶寶仍然可以做到野去幫助其他兔兔，仍然係有價值！Shirley 0既話令我深受感動，攬住兩個乖寶寶返屋企，我完全由心感受到兔地0既價值，真係好希望每一個兔寶寶都會有一個溫暖0既屋企！
希望聽日有好消息俾大家！
---------------------------------------------------------
真的太好了! 賓賓有好轉, 所以暫時不用捐血~
結果康康做了一隻「大配角」的臨時演員 XDDD
不過, 不用捐血對於大家來說, 都是一個好消息啦!
希望賓賓能一直康復
快一點回家~回到媽媽的懷裡啊! ^^
P.S. 其實康康真的沒有很偉大...(汗)
他...真的只是超級大後備的「肥美兔」XDDD
